Qazaxıstan Azərbaycan üzərindən neft ixracını genişləndirməyi planlaşdırır

Qazaxıstanın milli neft şirkəti "KazMunayGas" Xəzər Boru Kəməri Konsorsiumuna (CPC) hazırda iqtisadi və nəql həcmləri baxımından alternativ görmədiyini, lakin yeni ixrac marşrutlarının inkişafı istiqamətində iş apardığını açıqlayıb. Bu barədə şirkətin İdarə Heyətinin sədri Asxat Hasenov "Samruk-Kazına" İctimai Şurasının iclasında bildirib.

Hasenovun sözlərinə görə, ixrac marşrutlarının şaxələndirilməsi çərçivəsində Azərbaycan üzərindən keçən nəqliyyat dəhlizinin inkişafına xüsusi diqqət yetirilir. O, mühüm marşrutlardan birinin Atırau–Aktau və daha sonra Azərbaycan üzərindən uzanan istiqamət olduğunu qeyd edib. Hazırda bu layihə üzrə texniki-iqtisadi əsaslandırma hazırlanır.

Bundan əlavə, "KazMunayGas" rəhbəri Qazaxıstan–Çin neft kəmərinin genişləndirilməsi layihəsi üzrə də çinli tərəfdaşlarla texniki-iqtisadi əsaslandırmanın hazırlanmasına başlanıldığını bildirib.

Qeyd edək ki, Xəzər Boru Kəməri Konsorsiumu Qazaxıstanın Tengiz, Kaşaqan və Qaraçaqanak yataqlarından hasil olunan neftin əsas ixrac marşrutudur. 2025-ci ildə konsorsium vasitəsilə təxminən 70,5 milyon ton, 2026-cı ildə isə 72 milyon ton neftin nəqli proqnozlaşdırılır. Xarici yükgöndərənlər arasında Chevron, ExxonMobil, Eni, Shell və "KazMunayGas" yer alır.