elmRafiq Əliyev beynəlxalq riyaziyyat mükafatına layiq görülüb
AMEA-nın müxbir üzvü, professor Rafiq Əliyev Türkiyə Cümhuriyyəti Türk Dünyası Yörük Türkmən Birliyi tərəfindən təsis edilən "Qiyasəddin Cəmşid əl-Kaşi Riyaziyyat Mükafatı"na layiq görülüb. Bu barədə birlik tərəfindən alimə rəsmi bildiriş və dəvət məktubu göndərilib.
Türk Dünyası Yörük Türkmən Birliyi Türkiyə Respublikasının 3335 saylı Qanunu çərçivəsində Nazirlər Kabinetinin icazəsi ilə beynəlxalq mədəni əməkdaşlıq qurumu kimi fəaliyyət göstərir. Qurum bu il üçüncü dəfə Beynəlxalq Türk Dünyası Elm Mükafatlarını təqdim edəcək.
Mükafatın təqdimat mərasimi 8 oktyabr 2026-cı il tarixində Qazaxıstanın Almatı şəhərində keçiriləcək. Mərasimdə 15 kateqoriya üzrə mükafatlar təqdim olunacaq və tədbir Türk Dövlətləri Təşkilatı, TİKA, YTB, TÜRKSOY və digər qurumların dəstəyi ilə baş tutacaq.
Bu mükafat elmi araşdırmaları, innovativ ideyaları və beynəlxalq əməkdaşlığı təşviq etmək məqsədi daşıyır. Mükafata müxtəlif elm sahələrində mühüm nəticələr əldə etmiş şəxslər namizəd göstərilir. Təltifetmə mərasimləri türk dünyasında elmi əməkdaşlığın inkişafına töhfə verən alimlərin tanıdılmasına xidmət edir və türk dövlətləri arasında elm və təhsil sahəsində əlaqələrin gücləndirilməsinə dəstək verən təşəbbüslərdən biri hesab olunur.