Nəriman Həsənzadənin övladları: keçmiş gömrükçü və musiqişünas pedaqoq

Ötən həftə 96 yaşında vəfat edən Xalq şairi Nəriman Həsənzadənin övladları haqqında yeni məlumatlar ortaya çıxıb. Şairin iki övladı var: oğlu Nazim Həsənzadə və qızı Xatirə Həsənzadə. Hər ikisi müstəqil fəaliyyət göstərib, müxtəlif sahələrdə çalışıblar.

Nazim Həsənzadə 60 yaşını keçib. O, əvvəllər Dövlət Gömrük Komitəsində işləyib, hazırda təqaüdçüdür. Atasının vida mərasimində çıxış edən Nazim Həsənzadə bildirib ki, anası 1986-cı ildə vəfat etdikdən sonra şair bir daha ailə qurmayıb və həyatını tamamilə övladlarına həsr edib.

Xatirə Həsənzadə isə musiqişünasdır. 1959-cu il təvəllüdlü olan Xatirə xanım Bakı Musiqi Akademiyasının dosenti və sənətşünaslıq üzrə fəlsəfə doktorudur. O, 1978-1982-ci illərdə Üzeyir Hacıbəyov adına Azərbaycan Dövlət Konservatriyasında təhsil alıb və 1983-cü ildən Bakı Musiqi Akademiyasında çalışır.

Xatirə Həsənzadə həm də televiziya fəaliyyəti ilə tanınır. 1980-2014-cü illərdə AzTV-də "Operaladan parçalar", "Orfey" və Mədəniyyət kanalında "Musiqi xəzinəsi" verilişlərinin müəllifi və aparıcısı olub. O, 2005-ci ildən Azərbaycan Rəssamlar İttifaqının, 2013-cü ildən isə Bəstəkarlar İttifaqının üzvüdür.

Qeyd edək ki, Nəriman Həsənzadə həyat yoldaşı Sara xanımı erkən itirib və bu itki onun yaradıcılığında dərin iz buraxıb. Şair qızına yazdığı "Ürəyim ananı istəyir, qızım" şeirində bu acını əks etdirib. Həmkarlarının sözlərinə görə, şair qızına "anam", oğluna isə "atam" deyə müraciət edirmiş.