Metro xətlərinin ayrılması ilə əlaqədar Bakıda 6 yeni ekspres avtobus marşrutu yaradılacaq

Bakı Metropolitenində Qırmızı və Yaşıl xətlərin ayrılması layihəsi çərçivəsində "28 May" və "Nizami" stansiyaları arasında qatarların hərəkəti müvəqqəti dayandırılacaq. Bu səbəbdən yaranacaq nəqliyyat çətinliklərini azaltmaq üçün Azərbaycan Yerüstü Nəqliyyat Agentliyi (AYNA) əlavə tədbirlər görəcək.

AYNA-nın məlumatına görə, layihənin icrasına başlanıldığı andan etibarən müxtəlif istiqamətlərdə 6 yeni ekspres avtobus marşrutu istifadəyə veriləcək. Yeni marşrutlar metronun "Elmlər Akademiyası", "28 May", "İnşaatçılar", "Nizami", "20 Yanvar", "Koroğlu" və "Gənclik" stansiyalarını əhatə edəcək. Avtobuslar saat 06:00-dan 00:00-dək, metronun iş rejiminə uyğun olaraq hərəkət edəcək.

Bundan əlavə, mövcud 20-dən çox avtobus marşrutunda nəqliyyat vasitələrinin sayı artırılacaq və hərəkət intervalları azaldılacaq. Bu tədbirlər metronun bağlanması müddətində əlavə tələbatın qarşılanmasına yönəlib. Sərnişinlər alternativ marşrutlar barədə məlumatı "AYNA MaaS" mobil tətbiqi vasitəsilə də əldə edə biləcəklər.

Layihənin icra müddətində metronun "28 May", "20 Yanvar", "İnşaatçılar" və "Elmlər Akademiyası" stansiyalarının qarşısında könüllülər sərnişinlərə dəstək göstərəcəklər. Qeyd edilib ki, avqustun 15-dən etibarən "Nizami" və "28 May" stansiyaları arasında fəaliyyət göstərəcək əlavə avtobuslar ödənişli olacaq və gediş haqqı 60 qəpik təşkil edəcək.