Binalarda enerji sərfinin hesablanması metodologiyası təsdiqlənib

Energetika Nazirliyinin Kollegiyası "Binalarda enerji sərfinin hesablanması metodologiyası"nı təsdiqləyib. Nazir Pərviz Şahbazovun imzaladığı qərarla binaların illik enerji sərfinin hesablanması və enerji effektivliyi sinfinin müəyyən edilməsi qaydaları müəyyənləşib.

Metodologiyaya əsasən, enerji sərfinin hesablanması zamanı istilik təchizatı, soyuqluq təchizatı, isti su, işıqlandırma, təbii və mexaniki havalandırma sistemləri nəzərə alınır. Binada quraşdırılmış və funksional ehtiyacları təmin edən digər enerji istehlak edən sistemlər də hesablamalara daxil edilir, lakin enerji effektivliyi sinfinin müəyyən edilməsi zamanı nəzərə alınmır.

Enerji sərfinin müəyyən edilməsi dövrü tam illərlə ifadə olunur. Əgər bu dövr beş ildən azdırsa, iqlim göstəricilərinə görə düzəlişlər edilir. Binada enerji effektivliyinə 10 faizdən artıq təsir edən dəyişikliklər olubsa, əvvəlki məlumatlar istifadə olunmur. Dəyişikliklər 10 faizə qədər təsir edirsə, əvvəlki məlumatlar əsaslandırılmış düzəlişlərlə tətbiq edilir.

Elektrik enerjisi, qaz və istilik enerjisi təchizatçıları və ya bina mülkiyyətçisi tərəfindən təqdim olunan hesab-fakturalar faktiki istehlak həcminin hesablanması üçün əsas kimi istifadə oluna bilər. Bir sayğacla ötürülən enerji daşıyıcısı bir neçə sistemə sərf olunarsa, istehlak mütənasib olaraq bölüşdürülür. Maye yanacaq çənindəki səviyyə kalibrlənmiş miqyas vasitəsilə ölçülür, qaz istehlakı isə balonların sayına görə hesablanır.

Bərpa olunan enerji mənbələrindən alınan enerji istisna olmaqla, digər mənbələrdən istifadə zamanı istixana qazlarının emissiyaları metodologiyaya uyğun hesablanır. Tikinti zamanı layihədən kənarlaşma enerji effektivliyi göstəricilərinə təsir edərsə, istismara verilmə zamanı hesablamalara düzəlişlər edilir və binanın xarici zərfi ilə texniki sistemlərin faktiki göstəriciləri nəzərə alınır.