Fransada meşə yanğınları ilə bağlı 375 nəfər saxlanılıb

Fransa polisi ölkədə baş verən meşə yanğınları ilə əlaqədar 375 nəfəri saxlayıb. Bu barədə məlumat ölkənin Daxili İşlər Nazirliyinə istinadən yerli mətbuatda yayılıb. Saxlanılanlar arasında 142 nəfərin yetkinlik yaşına çatmayan şəxslər olduğu bildirilir.

Fransanın Baş naziri Sebastyan Lekornü ölkədəki yanğın vəziyyətinin ümumilikdə nəzarət altında olduğunu açıqlayıb. Onun sözlərinə görə, ölkənin cənub-qərbində yerləşən Jirond departamentində baş vermiş iri meşə yanğını artıq lokallaşdırılıb. Bununla belə, cənubdakı Var departamentində yanğınsöndürənlər hələ də alovun tam qarşısını ala bilməyiblər.

Qeyd edək ki, bu il Qərbi Avropada, xüsusilə İspaniya və Fransada müşahidə olunan meşə yanğınları rekord miqyasda olub. Avropa Komissiyası yanğınlarla mübarizə üçün Avropa İttifaqının Mülki Müdafiə Mexanizmi çərçivəsində 13 təyyarə, 4 helikopter və müxtəlif ölkələrdən yüzlərlə yanğınsöndürənin səfərbər edildiyini açıqlayıb.

Hazırda Fransanın 36 departamentində yüksək meşə yanğını riski elan edilib. Hakimiyyət orqanları vətəndaşları ehtiyatlı olmağa və yanğın təhlükəsizliyi qaydalarına riayət etməyə çağırır. Saxlanılan şəxslərin yanğınların törədilməsində şübhəli bilindiyi və araşdırmaların davam etdiyi bildirilir.