Bakı və regionlarda avqustun 7-də elektrik enerjisində planlı fasilələr olacaq

"Azərişıq" ASC-nin məlumatına görə, avqustun 7-də ölkənin paytaxtında və bir sıra regionlarında elektrik şəbəkəsində əsaslı təmir və yenidənqurma işləri aparılacaq. Bu işlər elektrik enerjisinin verilişində keyfiyyət göstəricilərinin artırılması və artan yük tələbatının qarşılanması məqsədi daşıyır. Təmir işləri ilə əlaqədar olaraq müəyyən ərazilərdə enerji təchizatında müvəqqəti məhdudiyyətlər tətbiq olunacaq.

Bakının Xətai rayonunda Abbas Səhhət, Aşıq Qurban, Marat Əmirxanov, İsgəndər Aznaurov, Rəşid Bağırov, Zakir Yusifov və Oqtay Vəliyev küçələrinin bir hissəsində saat 09:00-dan 17:00-dək elektrik enerjisinin verilişində məhdudiyyət gözlənilir. Nərimanov rayonunda isə Yusif Vəzir Çəmənzəminli, Maqsud Əlizadə və Xan Şuşinski küçələrində, həmçinin Koroğlu Rəhimov və Aşıq Alı küçələrinin kəsişməsində yerləşən yaşayış ərazisində saat 09:00-dan 13:00-dək fasilə olacaq.

Suraxanı rayonunun Hövsan qəsəbəsində İlqar Əhlimanov küçəsinin bir hissəsində saat 10:00-dan 13:00-dək planlı fasilə nəzərdə tutulub. Mingəçevir Elektrik Şəbəkəsinin xidməti ərazisində 6 kV-luq hava xətlərində təmir və budanma işləri ilə əlaqədar saat 09:00-dan 13:00-dək bəzi küçələrdə enerji təchizatı məhdudlaşdırılacaq.

Biləsuvar Elektrik Şəbəkəsinə daxil olan Köhnəkənd, Muğan və Yuxarı Ağalı kəndləri, həmçinin şəhərin bəzi hissələrində saat 10:00-dan 12:00-dək, Dərvişli, Amankənd, Ağalıkənd, Yuxarı Cürəli, Təzəkənd və Ovçubərə kəndlərində isə saat 11:00-dan 13:00-dək fasilə yaranacaq. Şəhər ərazisindəki bir sıra məntəqələrdə saat 14:00-dan 16:00-dək enerji verilişində məhdudiyyət tətbiq ediləcək.

Qurumdan bildirilib ki, görülən işlər yekunlaşdıqdan sonra adıçəkilən ərazilərdə abonentlər daha keyfiyyətli və dayanıqlı elektrik enerjisi ilə təmin olunacaqlar.