Xocalının Şuşakənd kəndində ilk körpə dünyaya gəlib

Xocalı rayonunun Şuşakənd kəndində Hüseynovlar ailəsində oğul övladı dünyaya gəlib. Bu, uzun illərdən sonra kənddə doğulan ilk körpədir və Böyük Qayıdış proqramı çərçivəsində əraziyə qayıdışın davam etdiyini göstərən əlamətdar hadisə kimi qiymətləndirilir.

Xankəndi şəhərində, Ağdərə və Xocalı rayonlarında Bərpa, Tikinti və İdarəetmə Xidmətinin ictimaiyyətlə əlaqələr şöbəsindən verilən məlumata görə, körpə avqustun 2-də xəstəxanadan evə buraxılıb. Yeni doğulan uşağın boyu 50 santimetr, çəkisi isə 2 kiloqram 700 qramdır.

Körpəyə Mustafa Kamal adı verilib. O, Şuşakənd sakini Şamil Hüseynovun ikinci övladıdır. Doğum hadisəsi kənd sakinləri üçün böyük sevinc mənbəyi olub.

Məlumatda qeyd olunur ki, bu sevinc yalnız Hüseynovlar ailəsinin deyil, doğma yurda qayıdan bütün Şuşakənd sakinlərinin sevincidir. Bu həm də Şuşakənddə yeni həyatın, davamlı məskunlaşmanın və Böyük Qayıdışın uğurla davam etdiyinin rəmzi kimi dəyərləndirilir.