Tələbə krediti üçün müraciətlər avqustun 3-dən başlayır

Təhsil Tələbə Krediti Fondu 2026-2027-ci tədris ilinin payız semestri üzrə müraciətlərin qəbulunu avqustun 3-dən etibarən elan edib. Müraciətlər e-ttkf.edu.az portalı vasitəsilə həyata keçiriləcək. Bu barədə Elm və Ali Təhsil üzrə Dövlət Agentliyindən məlumat verilib.

Müraciət hüququ Dövlət İmtahan Mərkəzinin qəbul müsabiqəsinin nəticələrinə əsasən magistratura səviyyəsinə qəbul olunmuş tələbələrə, həmçinin ali, orta ixtisas və peşə təhsili müəssisələrinin ikinci və daha yuxarı kurslarında təhsil alan tələbələrə verilir. Bakalavriat səviyyəsinə yeni qəbul olunanlar üçün müraciət imkanı ixtisas seçimi başa çatdıqdan sonra açılacaq.

Magistraturaya qəbul olunan tələbələr portal.edu.az üzərində tələbə qeydiyyatı prosesini apararkən paralel olaraq e-ttkf.edu.az portalından kredit üçün də müraciət edə bilərlər. Yeni qəbul olunan bakalavr və subbakalavr tələbələri isə ixtisas seçimini tamamladıqdan sonra təhsil müəssisəsinin qeydiyyatı zamanı eyni portal vasitəsilə müraciətlərini təqdim edə biləcəklər.

Standart təhsil tələbə krediti üçün birinci tədris ilinin ilk semestrində müəyyən edilmiş minimal qəbul göstəriciləri tətbiq olunur: subbakalavr üzrə 110 bal (xüsusi qabiliyyət tələb edən ixtisaslar üzrə 40 bal), bakalavriat üzrə 250 bal (xüsusi qabiliyyət üzrə 100 bal), magistratura üzrə 50 bal (xüsusi qabiliyyət üzrə 30 bal), SAT nəticələri əsasında qəbul olunanlar üçün minimum 1200 bal, texniki peşə və yüksək texniki peşə təhsili üzrə isə attestatda müvafiq fənlərdən yekun qiymətlərin ədədi ortası minimum 3 olmalıdır.

Qeyd edək ki, minimal qəbul göstəriciləri yalnız standart kreditlərə şamil edilir. Sosial təhsil tələbə krediti üçün isə minimal qəbul balı tələbi nəzərdə tutulmur.