Vozinya Çilinin "Kolo-Kolo" klubuna keçib

Kabo-Verde milli komandasının təcrübəli qapıçısı Vozinya Çilinin "Kolo-Kolo" klubu ilə müqavilə imzalayıb. Klubun rəsmi açıqlamasında futbolçunun artıq komandanın üzvü olduğu bildirilib. 40 yaşlı qolkiperlə bağlanan müqavilənin detalları açıqlanmasa da, Transfermarkt portalının məlumatına görə, anlaşma 2026-cı il dekabrın 31-dək qüvvədə olacaq. Futbolçunun bazar dəyəri 500 min avro olaraq qiymətləndirilir.

Çili mətbuatının yazdığına görə, Vozinya yeni komandasında debütünü avqustun 16-da "Ohiggins"ə qarşı keçiriləcək matçda edə bilər. Qeyd edək ki, qapıçının əsl adı Jozimar Joze Evora Diaşdır. Çili çempionatının qaydalarına əsasən, futbolçuların formalarında ləqəblərin yazılmasına icazə verilmədiyi üçün onun formasının arxa hissəsində "Diaş" və ya "Evora Diaş" yazılacaq.

Vozinya 2026-cı ildə Şimali Amerikada keçirilən dünya çempionatında dörd oyunda meydana çıxıb və onlardan ikisində qapısını toxunulmaz saxlayıb. O, qrup mərhələsində İspaniya və Uruqvay ilə heç-heçə edən Kabo-Verde yığmasının pley-offa yüksəlməsinə böyük töhfə verib. Komanda 1/16 finalda Argentinaya məğlub olub.

Təcrübəli qapıçının "Kolo-Kolo"ya keçidindən əvvəl son klubu Portuqaliyanın ikinci liqasında çıxış edən "Şaviş" olub. O, ötən mövsüm bütün turnirlərdə 19 oyunda iştirak edib və bunların altısında qapısından qol buraxmayıb. Vozinya karyerası ərzində Anqola, Kipr, Moldova və Slovakiya çempionatlarında da çıxış edib.