Əli Əsədov rəqabət qaydalarını təsdiqləyib

Baş nazir Əli Əsədov Nazirlər Kabinetinin yeni qərarını imzalayıb. Qərarla "Müvafiq bazarda sahələrin təmərküzləşmə səviyyəsinin müəyyən edilməsi Qaydası" və "Rəqabət orqanı tərəfindən təmərküzləşmələrin qiymətləndirilməsi Qaydası" təsdiq edilib. Hər iki sənəd Rəqabət Məcəlləsinə uyğun olaraq hazırlanıb.

Yeni təsdiqlənən qaydalar bazar subyektlərinin fəaliyyətində rəqabət mühitinin qorunmasına yönəlib. İlk qayda müvafiq bazarda təmərküzləşmə səviyyəsinin müəyyən edilməsi mexanizmini müəyyənləşdirir. Sənəddə istifadə olunan anlayışlar Rəqabət Məcəlləsi və digər normativ hüquqi aktlarla müəyyən edilmiş mənaları ifadə edir.

İkinci qayda isə rəqabət orqanı tərəfindən təmərküzləşmələrin qiymətləndirilməsi prosedurunu tənzimləyir. Bu qayda bazar subyektlərindən daxil olan ərizələrə baxılması, habelə razılıq alınmadan baş tutmuş təmərküzləşmələrin araşdırılması və nəzarət tədbirləri zamanı tətbiq ediləcək.

Qiymətləndirmə prosesində iqtisadi nəzəriyyə, empirik təhlillər və iqtisadi statistika əsas götürüləcək. Bundan əlavə, müvafiq bazarın şaquli və üfüqi əlaqəli olduğu qonşu bazarlarda rəqabət vəziyyəti də nəzərə alınacaq. Bu yanaşma təmərküzləşmələrin bazara təsirinin daha dolğun qiymətləndirilməsinə imkan verəcək.