Oman sahillərində yük gəmisi naməlum mərmi ilə vurulub

Böyük Britaniya Kral Dəniz Qüvvələrinin Dəniz Ticarət Əməliyyatları Mərkəzi (UKMTO) Oman sahillərində yük gəmisinə atəş açıldığı barədə məlumat yayıb. Hadisə ölkənin Xasab şəhərindən təxminən 20 dəniz mili şimal-şərqdə, çərşənbə axşamı səhər saatlarında qeydə alınıb. Mərkəzin bildirdiyinə görə, gəmi naməlum mərmi ilə vurulub və hadisədən sonra təcili yardım siqnalı yayımlayıb.

UKMTO hadisənin səbəblərinin araşdırıldığını açıqlayıb və bölgədən keçən gəmilərin heyətlərinə ehtiyatlı olmağı, hər hansı şübhəli fəaliyyət barədə dərhal məlumat verməyi tövsiyə edib. Hücuma görə hələlik heç bir qruplaşma məsuliyyəti öz üzərinə götürməyib.

Qeyd edək ki, son günlərdə bu cür hadisələr bir neçə dəfə baş verib. Mənbələrdə gəmilərin İran tərəfindən vurulduğu ilə bağlı şübhələrin olduğu, lakin Tehranın bu məlumatları təkzib etdiyi vurğulanır. Hadisənin dəniz ticarət yollarına təsiri və təhlükəsizlik vəziyyəti ilə bağlı əlavə araşdırmalar davam edir.