ATƏT-in sədri İqnasio Kassis Azərbaycana səfər edib

İsveçrənin Federal Şurasının üzvü və Federal Xarici İşlər Departamentinin rəhbəri İqnasio Kassis Azərbaycana rəsmi səfərə gəlib. Bu barədə o, özünün "X" sosial şəbəkə hesabında paylaşım edib. Kassis qeyd edib ki, Azərbaycana ilk rəsmi səfərini həyata keçirməkdən məmnundur və İsveçrə Azərbaycanla tərəfdaşlığı yüksək qiymətləndirir.

ATƏT-in fəaliyyətdə olan sədri kimi Kassis Cənubi Qafqazda dialoq, sülh, sabitlik və rifahın təşviqi ilə yanaşı, ticarət, innovasiya və iqtisadi əlaqələr sahəsində əməkdaşlığın dərinləşdirilməsini hədəflədiyini vurğulayıb. O, bu səfərin daha geniş regional təmasların başlanğıcı olacağını bildirib.

Qeyd edək ki, Kassis əvvəllər Azərbaycanın Şərqlə Qərb arasında körpü rolunu da vurğulamışdı. Səfər çərçivəsində onun Azərbaycan rəsmiləri ilə görüşləri və regional məsələlər ətrafında müzakirələr aparacağı gözlənilir.