Qaradağ Rayon İcra Hakimiyyətinin sabiq müavini Nadir Muradova hökm oxunub

Qaradağ Rayon İcra Hakimiyyəti başçısının sabiq müavini Nadir Muradovun cinayət işi üzrə məhkəmə araşdırması yekunlaşıb. Qaradağ Rayon Məhkəməsində keçirilən son iclasda hakim Şəfa Dadaşova hökm elan edib. Məhkəmə, təqsirləndirilən şəxsə Cinayət Məcəlləsinin 312-1.1-ci maddəsi ilə irəli sürülən ittihamı təsdiqləyib. Bu maddə vəzifəli şəxsin qərarına qanunsuz təsir göstərmə, yəni nüfuz alveri ilə bağlıdır.

Hökmə əsasən, Nadir Muradov 1 il 3 ay müddətinə azadlıqdan məhrum edilib. O, ötən ilin avqust ayından həbsdə olduğu üçün cəzanın çəkilməmiş hissəsi 6 ay təşkil edir. Məhkəmə istintaqı zamanı toplanan dəlillər, sübutlar və şahid ifadələri ittihamı əsaslandırıb.

Qeyd edək ki, ötən ilin noyabrında Baş Prokuror yanında Korrupsiyaya qarşı Mübarizə Baş İdarəsi Qaradağ Rayon İcra Hakimiyyətində əməliyyat keçirib. Əməliyyat zamanı bir neçə vəzifəli şəxs, o cümlədən 10 il müddətində birinci müavin vəzifəsində çalışmış Nadir Muradov həbs edilib. Bu hadisədən qısa müddət sonra rayonun icra başçısı Süleyman Mikayılov da vəzifəsindən azad edilib.