Jurnalistika ixtisasına qəbul üçün qabiliyyət imtahanı avqustun 4-də keçiriləcək

Dövlət İmtahan Mərkəzi (DİM) avqustun 4-də ali təhsil müəssisələrinin bakalavriat səviyyəsinin jurnalistika ixtisasına qəbul olmaq istəyən abituriyentlər üçün qabiliyyət imtahanı keçirəcək. İmtahanda yalnız internet vasitəsilə anket dolduraraq qeydiyyatdan keçmiş və III ixtisas qrupu üzrə test imtahanında müsabiqə şərtini ödəyən namizədlər iştirak edə bilər. Ümumilikdə 827 abituriyentin iştirakı nəzərdə tutulur.

İmtahan Bakı şəhərində və DİM-in regional bölmələrinin yerləşdiyi Naxçıvan, Gəncə, Lənkəran, Şəki, Bərdə, Kürdəmir və Şirvan şəhərlərində təşkil olunacaq. Qabiliyyət imtahanı kompüterlər vasitəsilə keçiriləcək və abituriyentlər inşanı elektron formada yazacaqlar. İmtahan saat 10:00-da başlayacaq və 3 saat davam edəcək.

İmtahana buraxılış rejimi saat 09:45-də, yəni imtahanın başlanmasına 15 dəqiqə qalmış başa çatacaq. Bu vaxtdan sonra gələn iştirakçılar imtahan binasına buraxılmayacaq. Hər bir iştirakçı üçün binaya gəlmə vaxtı fərqlidir və bu, "İmtahana buraxılış vərəqəsi"ndə qeyd olunub. Həmin sənəd DİM-in internet saytından çap edilə bilər.

Abituriyentlər imtahana buraxılış vərəqəsi və şəxsiyyəti təsdiq edən sənədin əsli ilə gəlməlidirlər. Azərbaycan vətəndaşları şəxsiyyət vəsiqəsi, əcnəbilər və vətəndaşlığı olmayan şəxslər isə Dövlət Miqrasiya Xidməti tərəfindən verilmiş müvafiq sənədləri təqdim etməlidirlər. Şəxsiyyət vəsiqəsində şəkli olmayan iştirakçılar üçün təhsil müəssisəsi tərəfindən verilmiş fotoşəkilli arayış tələb olunur.

Bu mərhələdən uğurla keçən abituriyentlər ixtisas seçimi zamanı digər ixtisaslarla yanaşı "Jurnalistika" ixtisasını da seçə bilərlər. İmtahanla bağlı ətraflı məlumat, o cümlədən inşa mövzuları və tələblər DİM-in rəsmi saytında Azərbaycan və rus dillərində yerləşdirilib.