Jurnalistika ixtisası üzrə qabiliyyət imtahanı avqustun 4-də keçiriləcək

Dövlət İmtahan Mərkəzi (DİM) avqustun 4-də ali təhsil müəssisələrinin bakalavriat səviyyəsinin jurnalistika ixtisasına qəbul olmaq istəyən abituriyentlər üçün qabiliyyət imtahanı keçirəcək. İmtahanda yalnız internet vasitəsilə anket dolduraraq qeydiyyatdan keçmiş və III ixtisas qrupu üzrə test imtahanında müsabiqə şərtini ödəmiş namizədlər iştirak edə bilər. Ümumilikdə 827 abituriyentin iştirakı nəzərdə tutulur.

İmtahan Bakı şəhərində və DİM-in regional bölmələrinin yerləşdiyi Naxçıvan, Gəncə, Lənkəran, Şəki, Bərdə, Kürdəmir və Şirvan şəhərlərində təşkil olunacaq. Qabiliyyət imtahanı kompüterlər vasitəsilə keçiriləcək və abituriyentlər inşanı elektron formada yazacaqlar. İmtahan saat 10:00-da başlayacaq və 3 saat davam edəcək. Buraxılış rejimi isə saat 09:45-də başa çatacaq, bu vaxtdan sonra gələn iştirakçılar binaya buraxılmayacaq.

İmtahan iştirakçıları "İmtahana buraxılış vərəqəsi"ni DİM-in internet saytından çap etməlidirlər. Sənəddə imtahanın keçiriləcəyi şəhər, bina, zal, başlanma vaxtı və abituriyentin binaya gəlmə vaxtı göstərilib. Həmçinin abituriyentlərə "Yaddaş kitabçası"ndan çıxarış təqdim olunur ki, orada imtahan prosesi ilə bağlı tövsiyələr və qaydalar əks olunub. Binaya rahat daxil olmaq üçün müxtəlif gəlmə vaxtları müəyyən edilib və bu vaxta riayət etmək tövsiyə olunur.

Abituriyentlər imtahana şəxsiyyəti təsdiq edən sənədin əsli ilə gəlməlidirlər. Azərbaycan vətəndaşları şəxsiyyət vəsiqəsi, əcnəbilər və vətəndaşlığı olmayan şəxslər isə Dövlət Miqrasiya Xidməti tərəfindən verilmiş icazə vəsiqəsi və ya qaçqın vəsiqəsi təqdim etməlidirlər. Şəxsiyyət vəsiqəsində şəkli olmayan iştirakçılar əlavə olaraq təhsil müəssisəsi tərəfindən verilmiş və fotoşəkli yapışdırılmış arayış gətirməlidirlər.

Bu mərhələdən uğurla keçən abituriyentlər ixtisas seçimi zamanı digər ixtisaslarla yanaşı "Jurnalistika" ixtisasını da seçə bilərlər. Qabiliyyət imtahanında təklif olunacaq inşa mövzuları və esseyə verilən tələblərlə DİM-in saytında Azərbaycan və rus dillərində tanış olmaq mümkündür.