İyulda hava iqlim normasından yüksək olub

2026-cı ilin iyul ayında Bakı və Abşeron yarımadasında havanın temperaturu iqlim norması ilə müqayisədə əksər günlərdə normadan yuxarı olub. Milli Hidrometeorologiya Xidmətinin rəsmisi Gülnarə Abbasovanın məlumatına görə, ay ərzində 27 gün temperatur normadan 0-6 dərəcə yüksək, 2 gün normadan aşağı, 2 gün isə norma daxilində qeydə alınıb. Orta aylıq temperatur 28 dərəcə isti olub ki, bu da iqlim normasını 1 dərəcə üstələyib.

Ay ərzində ən yüksək temperatur iyulun 26-da qeydə alınıb: Bakı və Abşeron yarımadasında maksimum 40 dərəcə (Sumqayıt), bölgələrdə isə 41 dərəcə (Ordubad) olub. Ən aşağı temperatur isə Bakı və Abşeronda iyulun 3 və 9-da 20 dərəcə (Maştağa və Sumqayıt), yüksək dağlıq ərazilərdə iyulun 2-də 4 dərəcə (Şahdağ) təşkil edib.

Yağıntıların miqdarı da bölgələr üzrə qeyri-bərabər paylanıb. Ən çox yağıntı aylıq normanın 324 faizi ilə Balakən-Şəki zonasına (Balakən – 250 mm) düşüb. Mərkəzi Aran zonasında yağıntı normanın 236 faizini (Mingəçevir – 47 mm), Lənkəran-Astara zonasında 144 faizini (Lənkəran – 20 mm), Bakı və Abşeron yarımadasında isə 125 faizini (Bakı – 3 mm) təşkil edib. Bəzi günlərdə yağıntılar intensiv və güclü olub, şimşək çaxıb, dolu düşüb.

Dolu hadisələri Laçın rayonunun Şəlvə, Qovuşuq və Vəlibəyli kəndlərində, Şuşa şəhərində və Kəlbəcər rayonunun İstisu qəsəbəsində müşahidə olunub. Ən iri dolu İstisu qəsəbəsində qeydə alınıb, diametri 8-12 millimetr təşkil edib.

Küləkli hava şəraiti ilə əlaqədar iyulda 10 sarı və narıncı xəbərdarlıq verilib. Bakı və Abşeron yarımadasında 9 gün, bölgələrdə isə 21 gün küləkli hava müşahidə olunub. Küləyin maksimal sürəti iyulun 27-də Bakı və Abşeronda 28 m/s, bölgələrdə isə 23 m/s-ə çatıb.