Ceki Çan Bakıya gəlib — "Tanrının Zirehi 4" filminin çəkilişləri paytaxtda aparılacaq

Dünya şöhrətli aktyor Ceki Çan Bakıya səfər edib. Sosial şəbəkələrdə yayılan məlumata görə, onun səfərinin əsas məqsədi yeni beynəlxalq film layihəsində iştirak etməkdir. Söhbət "Tanrının Zirehi 4" (Armour of God 4: The Ultimatum) adlı ekran əsərindən gedir və bu filmin çəkilişlərinin bir hissəsi Azərbaycan paytaxtında həyata keçiriləcək.

Bakıda çəkilişlərin şəhərin tanınmış məkanlarında — İçərişəhərdə, Dağüstü Parkda, Bakı Funikulyorunda, Yaşıl Teatrda, Fəvvarələr Meydanında və paytaxtın bəzi mərkəzi küçələrində aparılması planlaşdırılır. Bu yerlərin seçilməsi filmin vizual təqdimatında Bakının memarlıq və mədəni irsinin əks olunmasına imkan verəcək.

Filmin istehsalında Çin və Qazaxıstan iştirak edir. Layihə beynəlxalq əməkdaşlıq çərçivəsində reallaşdırılır və geniş auditoriyaya hesablanıb. Ekran əsərinin premyerası isə 2027-ci ilin ikinci rübünə planlaşdırılıb.

Ceki Çanın Bakıya gəlişi həm yerli kino ictimaiyyəti, həm də aktyorun pərəstişkarları tərəfindən maraqla qarşılanıb. Bu səfər Azərbaycanın beynəlxalq kino layihələri üçün cəlbedici məkan kimi tanıdılması baxımından əhəmiyyətli hesab edilir.