İncəsənət məktəblərinə işə qəbul üzrə test imtahanı avqustun 8-də keçiriləcək

Avqustun 8-də Azərbaycan Respublikası Mədəniyyət Nazirliyinin tabeliyindəki incəsənət məktəb və mərkəzlərinə direktor, direktor müavini və müəllim vəzifələri üzrə işə qəbul imtahanı keçiriləcək. Dövlət İmtahan Mərkəzinin (DİM) məlumatına görə, imtahan iki növbədə təşkil olunacaq və saat 10:00-da və 16:00-da başlayacaq. Namizədlərə buraxılış vərəqəsində göstərilən vaxtda imtahan binasına gəlmələri tövsiyə olunur; saat 09:45-dən və 15:45-dən sonra gələnlər imtahana buraxılmayacaq.

Qeydiyyatdan keçmiş namizədlər DİM-in internet saytından "İmtahana buraxılış vərəqəsi"ni çap etməlidirlər. Sənəddə imtahanın tarixi, yeri, binası, zalı, başlama vaxtı və namizədin gəliş vaxtı göstərilib. İştirakçılar həmçinin DİM-in saytında yerləşdirilən "Yaddaş kitabçası" ilə tanış ola bilərlər. İmtahana şəxsiyyəti təsdiq edən sənəd və buraxılış vərəqəsi ilə gəlmək lazımdır.

Direktor və direktor müavinləri üçün imtahan 3 saat, müəllimlər üçün isə 2 saat davam edəcək. Rəhbər vəzifələr üçün namizədlərin normativ hüquqi aktlar, pedaqogika və pedaqoji psixologiya, məntiqi təfəkkür və ümumi dünyagörüşü üzrə bilikləri yoxlanılacaq. Onlara ümumilikdə 100 qapalı tipli test tapşırığı təqdim olunacaq: normativ hüquqi aktlar üzrə 50, pedaqogika və pedaqoji psixologiya üzrə 15, məntiqi təfəkkür üzrə 15 və ümumi dünyagörüşü üzrə 20 sual.

Müəllim vəzifəsi üçün imtahanda ixtisas bilikləri ("Musiqi", "Təsviri sənət", "Xoreoqrafiya" istiqamətləri üzrə), həmçinin pedaqogika, məntiqi təfəkkür və ümumi dünyagörüşü yoxlanılacaq. Musiqi istiqamətində suallar namizədin ixtisasına uyğun olaraq "Milli musiqi" və "Klassik musiqi" bölmələri üzrə veriləcək. Ümumilikdə 70 test tapşırığı təqdim olunacaq: ixtisas üzrə 40, pedaqogika üzrə 10, məntiq üzrə 10 və dünyagörüşü üzrə 10 sual. Hər düzgün cavab 1 balla qiymətləndirilir, səhv cavablar nəticəyə təsir etmir.

İmtahan Bakıda DİM-in Elektron İmtahanlar Korpusunda və Naxçıvanda 4 saylı tam orta məktəbdə kompüter vasitəsilə keçiriləcək. Ümumilikdə 1350 namizəd qeydiyyatdan keçib: 121 nəfər direktor və direktor müavini, 1229 nəfər isə müəllim vəzifəsi üçün müraciət edib. İmtahanın təşkili üçün 15 zal administratoru, 89 nəzarətçi-müəllim və 14 buraxılış rejimi əməkdaşı cəlb olunub. İmtahanda 5 nəfər görmə məhdudiyyətli namizəd də iştirak edəcək; onlar üçün xüsusi şərait yaradılıb və fərdi nəzarətçilər təyin edilib.