Ceyhun Bayramov Kiyevdə Ukrayna PUA-larının sərgisi ilə tanış olub

Azərbaycanın xarici işlər naziri Ceyhun Bayramov Ukraynaya rəsmi səfəri çərçivəsində Kiyevdə Ukrayna istehsalı olan pilotsuz uçuş aparatlarının (PUA) sərgisi ilə tanış olub. Bu barədə Azərbaycan Xarici İşlər Nazirliyi “X” sosial şəbəkəsində məlumat yayıb.

Məlumata görə, Ukraynanın xarici işlər naziri Andrey Sibiqa Ceyhun Bayramovu Ukrayna Xarici İşlər Nazirliyində rəsmi qarşılama mərasimi ilə qarşılayıb. Rəsmi qarşılanma mərasimindən sonra nazirlər birlikdə Ukraynada istehsal olunan pilotsuz uçuş aparatlarının sərgisinə baxıblar.

Səfər çərçivəsində nazirlərin danışıqlar apardığı da bildirilir. Görüşün əsas müzakirə mövzuları barədə ətraflı məlumat verilməyib.

Qeyd edək ki, Ceyhun Bayramovun Ukraynaya rəsmi səfəri avqustun 6-da başlayıb. Səfər çərçivəsində iki ölkə arasında ikitərəfli əlaqələrin müxtəlif istiqamətlərdə müzakirə olunacağı gözlənilir.