Qənimət Zahid Çingiz Qənizadəyə məhkəmə qərarı ilə təzminat ödəyib

Demokratiya və İnsan Hüquqları Komitəsinin sədri, hüquq üzrə fəlsəfə doktoru Çingiz Qənizadə mətbuata açıqlama verib. O, Paris Cinayət Məhkəməsinin 2025-ci il oktyabrın 21-də Qənimət Səlim oğlu Zahidov barəsində çıxardığı hökmün icrasının tamamlandığını bildirib. Qənizadənin sözlərinə görə, həmin qərarla Zahid Fransa qanunvericiliyinə əsasən cinayət törətmiş şəxs kimi tanınıb və bu ölkədə cinayət törətmiş şəxslər kateqoriyasına daxil edilib.

Çingiz Qənizadə qeyd edib ki, məhkəmənin yekun qərarında əsas məqam məhkumluq faktının yaradılması olub və bu halın hansısa cəzanın tətbiqindən daha vacib olduğu vurğulanıb. O, bunun Azərbaycan tarixində ilk dəfə olduğunu bildirib ki, xaricə sığınmış, Azərbaycan dövlətinə, dövlət rəsmilərinə və ictimai-siyasi xadimlərə qarşı böhtan yayan bloqerlərdən biri haqqında sığındığı ölkənin məhkəməsində belə bir qərar qəbul edilib.

Hüquqşünas qeyd edib ki, məhkəmə prosesi 2019-cu ildə başlayıb və 2025-ci il oktyabrın 21-də yekunlaşıb. Prosesin uzun müddət çəkməsini o, pandemiya dövrü ilə əlaqələndirib. Məhkəmənin hökmünə əsasən, Qənimət Zahid həm Fransa qanunları ilə cərimə ödəməli olub, həm də Çingiz Qənizadəyə dəymiş maddi və mənəvi zərərə görə kompensasiya ödəmək öhdəliyi daşıyıb.

Çingiz Qənizadə bildirib ki, Zahid uzun müddət kompensasiyanı ödəməkdən yayınıb. Lakin Fransadakı vəkillərinin səyi və qarşı tərəfin vəkillərinin qanuna hörmət etməsi nəticəsində iki gün əvvəl məhkəmənin müəyyən etdiyi kompensasiya tam həcmdə ödənilib. O, bu nəticəni qələbə kimi qiymətləndirib və məqsədinin belə şəxslərin sığındıqları ölkələrdə qanun qarşısında cavab verməsinə nail olmaq olduğunu vurğulayıb.