Bilgəhdə dənizdə batan gəncin meyiti tapılıb, üç nəfər xilas edilib

Bakının Sabunçu rayonunun Bilgəh qəsəbəsində dənizdə bir nəfərin batması hadisəsi baş verib. Fövqəladə Hallar Nazirliyinin "112" qaynar telefon xəttinə daxil olan məlumata əsasən, hadisə ən yaxın sularda xilasetmə məntəqəsindən təxminən 1 kilometr aralıda, nəzarətsiz ərazidə qeydə alınıb.

Məlumatdan dərhal sonra FHN-in Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-xilasediciləri axtarışlara cəlb olunub. Aparılan əməliyyat zamanı üç nəfər - 2001-ci il təvəllüdlü Fətəliyev Məhəbbət Şövkət oğlu, 2000-ci il təvəllüdlü Mustafayev Sahil Bəhruz oğlu və 2001-ci il təvəllüdlü Cəlalov Elburus Zümrüd oğlu xilas edilib.

Axtarışlar nəticəsində dalğıclar tərəfindən 2005-ci il təvəllüdlü Pirməmmədov Niyaz Vasif oğlunun meyiti suda tapılaraq çıxarılıb və aidiyyəti üzrə təhvil verilib. Hadisə ilə bağlı əlavə məlumat verilməyib.

Qeyd edək ki, hadisə Bilgəh qəsəbəsində dənizdə nəzarətsiz ərazidə baş verib. Xilasedicilərin operativ müdaxiləsi sayəsində üç nəfərin həyatını xilas etmək mümkün olub.