Türkiyənin HvBS sistemi Azərbaycan Hərbi Hava Qüvvələrinə təhvil verilib

Türkiyənin HAVELSAN şirkəti tərəfindən hazırlanmış Hərbi Hava Qüvvələri Məlumat Sistemi (HvBS) çərçivəsindəki bəzi imkanlar Azərbaycan Hərbi Hava Qüvvələrinin inventarına daxil edilib. Bu barədə məlumat yayılıb.

Təhvil verilən sistem əməliyyat mərkəzlərində çalışan şəxsi heyətə vahid əməliyyat mənzərəsi üzərində işləməyə, tapşırıq və əməliyyat məlumatlarını real vaxt rejimində idarə etməyə, kritik məlumatları mərkəzləşdirilmiş şəkildə izləməyə və qərar qəbuletmə prosesini sürətləndirməyə imkan verir. Bu da planlaşdırma, koordinasiya və əməliyyatların icrasını daha sürətli və səmərəli edir.

HvBS bütün komponentləri vahid platformada birləşdirən dünyanın ən əhatəli hərbi hava qüvvələri məlumat sistemlərindən biri kimi qiymətləndirilir. Sistem əməliyyat hazırlığı proseslərini dəqiqələr səviyyəsinə endirərək hava əməliyyatlarında manevr imkanlarını artırır.

Sistemin modulları müxtəlif komanda səviyyələri arasında təhlükəsiz məlumat mübadiləsini təmin edir, hava əməliyyatlarına dair kritik informasiyanın eyni vaxtda görüntülənməsinə və dəyişən şəraitə uyğun operativ idarəetməyə şərait yaradır. Açıq və modul arxitekturası sayəsində mövcud komanda-idarəetmə infrastrukturuna asan inteqrasiya olunur və istifadəçi tələblərinə uyğun genişləndirilə bilir.

Bu təhvil prosesi Türkiyə ilə Azərbaycan arasında müdafiə sənayesi sahəsində əməkdaşlığın proqram təminatı və komanda-idarəetmə texnologiyaları istiqamətində yüksək səviyyəyə çatdığını göstərir.