Bakının üç rayonunda və Mingəçevirdə avqustun 7-də elektrik enerjisində fasilələr olacaq

Avqustun 7-də Bakının Xətai, Nərimanov və Suraxanı rayonlarında, həmçinin Mingəçevirdə elektrik şəbəkəsində planlı təmir və yenidənqurma işləri aparılacaq. Bu barədə “Azərişıq” ASC məlumat yayıb. Şirkətdən bildirilib ki, işlər elektrik enerjisinin verilişində keyfiyyət göstəricilərinin artırılması və artan yük tələbatının qarşılanması məqsədi daşıyır.

Xətai Rayon Enerji Təchizatı və Satışı İdarəsinin xidməti ərazisində Abbas Səhhət, Aşıq Qurban, Marat Əmirxanov, İsgəndər Aznaurov, Rəşid Bağırov, Zakir Yusifov və Oqtay Vəliyev küçələrinin bir hissəsində saat 09:00-dan 17:00-dək elektrik enerjisinin verilişində məhdudiyyət tətbiq olunacaq.

Nərimanov RETSİ-nin ərazisində Yusif Vəzir Çəmənzəminli, Maqsud Əlizadə və Xan Şuşinski küçələrində, həmçinin Koroğlu Rəhimov və Aşıq Alı küçələrinin kəsişməsində yerləşən yaşayış sahəsində saat 09:00-dan 13:00-dək fasilə gözlənilir. Suraxanı rayonunun Hövsan qəsəbəsində isə İlqar Əhlimanov küçəsinin bir hissəsində saat 10:00-dan 13:00-dək enerji verilişi dayandırılacaq.

Mingəçevir Elektrik Şəbəkəsinin xidməti ərazisində bir sıra 6 kV-luq hava xətlərində təmir və budanma işləri aparılacaq. Bu səbəbdən saat 09:00-dan 13:00-dək bəzi küçələrdə elektrik enerjisində məhdudiyyət yaranacaq.

Görülən işlər başa çatdıqdan sonra həmin ərazilərdə abonentlərin daha keyfiyyətli və dayanıqlı elektrik enerjisi ilə təmin ediləcəyi bildirilir.