Azərbaycanda sürücüsüz avtobusların tətbiqi üçün hüquqi baza yaradılır

Azərbaycanda avtonom yerüstü nəqliyyat vasitələrinin tətbiqi üçün hüquqi əsaslar hazırlanır. Qanunvericiliyə ilk dəfə olaraq "avtonom nəqliyyat vasitəsi", "operator" və "məsafədən idarəetmə mərkəzi" kimi anlayışlar daxil edilib. Bundan əlavə, yüksək və tam avtomatlaşdırılmış idarəetmə səviyyələri müəyyənləşdirilib ki, bu da müvafiq sahədə fəaliyyətin hüquqi tənzimlənməsinə imkan yaradır.

Yeni qaydalar xüsusi marşrutlar üzrə hərəkət edən sürücüsüz avtobusların, habelə sürücüsüz metro qatarlarının və uzaqdan idarə olunan tramvay və dəmir yolu sistemlərinin qanuni əsaslarla istismarına şərait yaradacaq. Rəqəmsal inkişaf və nəqliyyat nazirinin müavini Rəhman Hümbətov bildirib ki, avtonom nəqliyyat vasitələrinin iqtisadi, ekoloji və təhlükəsizlik baxımından bir sıra üstünlükləri olacaq.

Yol hərəkəti üzrə ekspert Ərşad Hüseynov qeyd edib ki, bu cür nəqliyyat vasitələri sürücünü tam əvəz edə biləcək bütün bacarıqlara malik olmalıdır ki, kənar müdaxilə olmadan yol hərəkəti qaydalarına riayət edə bilsin. Həmçinin avtonom nəqliyyat vasitələrinin fərqləndirici nişanları da olacaq.

Avtonom nəqliyyat vasitələri yalnız dövlət qeydiyyatından keçdikdən və səlahiyyətli qurumların müəyyən etdiyi ərazilərdə istismara buraxıldıqdan sonra fəaliyyət göstərə biləcək. İlkin mərhələdə sürücüsüz avtobusların xüsusi ayrılmış zolaqlarda və ya məhdud marşrutlarda sınaq və istismarı nəzərdə tutulur.

İstismar prosesinə nəzarət xüsusi şəhadətnamə əsasında fəaliyyət göstərən operatorlar tərəfindən həyata keçiriləcək. Bu o deməkdir ki, nəqliyyat vasitəsində sürücü olmasa belə, məsafədən idarəetmə mərkəzində operator sistemin işini izləyəcək və zərurət yarandıqda müdaxilə edə biləcək.