Ağdamda əkin sahələrini yandıran şəxs saxlanılıb

Ağdam rayonu ərazisində son günlər baş vermiş yanğın hadisələrinin səbəbləri ilə bağlı aparılan araşdırmalar nəticəsində şübhəli şəxs saxlanılıb. Daxili İşlər Nazirliyinin Mətbuat Xidmətindən verilən məlumata görə, polis əməkdaşları əraziyə pilotsuz uçuş aparatı (PUA) qaldıraraq və video-müşahidə kameralarının görüntülərini təhlil ediblər.

Araşdırmalar zamanı Ağdam-Ağcabədi inzibati ərazilərinin kəsişməsində yerləşən əkin sahələrinin qəsdən yandırılması faktı müəyyən edilib. İlkin məlumatlara görə, hadisəni 77-PT-225 dövlət qeydiyyat nişanlı "Niva" markalı avtomobili idarə edən 29 yaşlı Səbuhi Hüseynli törədib. Şübhəli şəxs saxlanılıb və faktla bağlı cinayət işi başlanılıb.

Hazırda S.Hüseynlinin təqsirləndirilən şəxs qismində istintaqa cəlb edilməsi, hadisənin bütün hallarının tam və hərtərəfli araşdırılması, habelə əmələ hüquqi qiymət verilməsi istiqamətində zəruri prosessual tədbirlər davam etdirilir. Daxili İşlər Nazirliyi əlavə məlumat verəcəyini bildirib.