Sənədsiz evlərə çıxarış: Ekspert hüquqi yolları açıqladı

Azərbaycanda sənədsiz evlərin rəsmiləşdirilməsi və onlara çıxarış alınması uzun müddətdir vətəndaşları narahat edən məsələlərdən biridir. Əmlak məsələləri üzrə ekspert Elnur Azadov bildirib ki, bu proses yalnız müəyyən hüquqi əsaslar olduqda mümkündür və əksər hallarda məhkəməyə müraciət tələb olunur.

Ekspertin sözlərinə görə, sənədsiz evə çıxarış almaq yalnız məhkəmə qaydasında mümkündür. Bunun üçün ciddi hüquqi əsasların olması vacibdir. Əgər ev qanunsuz tikilibsə və tikinti zamanı qanunvericiliyin tələbləri pozulubsa, belə əmlakın rəsmiləşdirilməsi mümkün olmaya bilər.

Bəzi hallarda problem evin tamamilə qanunsuz tikilməsi ilə deyil, sənədlərin natamam olması və ya rəsmiləşdirmə prosedurlarının vaxtında tamamlanmaması ilə bağlı olur. Bu vəziyyətlərdə məhkəmə təqdim olunan sübutları və əmlakın hüquqi statusunu araşdıraraq müvafiq qərar qəbul edir.

Ekspert vurğulayıb ki, əgər söhbət yalnız sənəd çatışmazlıqlarından gedirsə, məhkəmə həmin əmlak üzərində mülkiyyət hüququnu tanıya bilər. Lakin hər bir iş fərdi qaydada qiymətləndirilir və evin sadəcə faktiki mövcudluğu çıxarış almaq üçün kifayət etmir.