Sabah Abşeron çimərliklərində hava şəraiti açıqlanıb

Milli Hidrometeorologiya Xidməti avqustun 4-də Abşeron çimərliklərində gözlənilən hava şəraiti barədə məlumat yayıb. Xəbərə görə, sabah Abşeron yarımadasında hava şəraitinin yağmursuz keçəcəyi gözlənilir. Şimal-şərq küləyi gündüz cənub-şərq küləyi ilə əvəzlənəcək.

Dəniz suyunun temperaturu şimal çimərliklərində – Sumqayıt, Novxanı, Pirşağı, Nardaran, Bilgəh və Zaqulbada 26-27 dərəcə, cənub çimərliklərində – Türkan, Hövsan, Sahil və Şıxda isə 27-28 dərəcə isti olacaq.

Bakıda və Abşeron yarımadasında havanın temperaturu gecə 23-26 dərəcə, gündüz isə 31-36 dərəcə isti təşkil edəcək. Atmosfer təzyiqi norma daxilində 760 mm civə sütunu, nisbi rütubət gecə 70-75 faiz, gündüz 45-50 faiz olacaq.

Azərbaycanın rayonlarında da havanın əsasən yağmursuz keçəcəyi gözlənilir. Lakin gündüz bəzi dağlıq ərazilərdə qısamüddətli yağış yağacağı və şimşək çaxacağı ehtimalı var. Gecə və səhər bəzi dağlıq ərazilərdə arabir duman müşahidə olunacaq. Havanın temperaturu gecə 22-26 dərəcə, gündüz 33-38 dərəcə, dağlarda isə gecə 15-20 dərəcə, gündüz 23-28 dərəcə isti olacaq.

Avqust ayında havanın orta aylıq temperaturunun iqlim normasına yaxın, bəzi yerlərdə isə bir qədər yüksək olacağı gözlənilir. Aylıq yağıntının miqdarının da iqlim normasına yaxın olacağı ehtimal edilir. Ayın ilk günlərində ölkə ərazisində əksər rayonlarda əsasən yağmursuz hava şəraiti müşahidə olunacaq, lakin bəzi dağlıq və dağətəyi ərazilərdə qısamüddətli yağış yağacağı gözlənilir.