Rezidenturaya qəbul imtahanının II mərhələsi avqustun 9-da keçiriləcək

Dövlət İmtahan Mərkəzi (DİM) rezidenturaya qəbul imtahanının ikinci mərhələsinin avqustun 9-da keçiriləcəyini açıqlayıb. İmtahan Bakıda DİM-in elektron imtahanlar korpusunda (Binəqədi rayonu, S.S.Axundov küçəsi, 50, TÜRKPA-nın yanı) və Naxçıvan şəhərindəki 4 saylı orta məktəbdə elektron formada təşkil olunacaq. Test iki növbədə aparılacaq: birinci növbə saat 10:00-da, ikinci növbə isə saat 15:00-da başlayacaq. İmtahanın müddəti 2 saat 30 dəqiqədir.

İmtahanın başlanmasına 15 dəqiqə qalmış, yəni saat 09:45-də və 14:45-də buraxılış rejimi başa çatacaq. Bu vaxtdan sonra gələn iştirakçılar imtahan binasına buraxılmayacaq. Namizədlərə "İmtahana buraxılış vərəqəsi"ni çap etmələri tövsiyə olunur. Sənəddə imtahanın tarixi, yeri, binası, zalı, başlama vaxtı və namizədin binaya gəliş vaxtı kimi məlumatlar əks olunub. İmtahan qaydaları ilə "Yaddaş kitabçası"nda, elektron imtahan sisteminə aid təlimatla isə müvafiq linkdə tanış olmaq mümkündür.

İmtahana gələrkən namizədlər şəxsiyyətini təsdiq edən sənədin əslini və buraxılış vərəqəsini mütləq özləri ilə gətirməlidirlər. Sənədlərdən hər hansı biri olmadıqda və ya sənədlər arasında uyğunsuzluq aşkar edildikdə, namizəd imtahana buraxılmayacaq.

İkinci mərhələdə iştirak etmək üçün ümumilikdə 996 namizəd qeydiyyatdan keçib. Onlardan 360-ı oğlan, 636-sı qızdır. Azərbaycan bölməsi üzrə 831, rus bölməsi üzrə 165 namizəd qeydiyyatdan keçib. Cari ilin məzunları 426 nəfər, əvvəlki illərin məzunları isə 570 nəfərdir. Üç nəfər xarici ölkə vətəndaşıdır. Bakıda 957, Naxçıvanda isə 39 namizədin imtahan verəcəyi gözlənilir.

İmtahanın idarə olunması üçün 12 zal administratoru, 67 zal nəzarətçisi və 11 buraxılış rejimi (mühafizə) əməkdaşı ayrılıb. Qeyd edək ki, bu mərhələdə iştirak edəcək 996 nəfərdən 314-ü ötən illərdəki imtahan nəticəsinə görə, 682-si isə builki imtahanlarda məqbul qiymət aldığı üçün ixtisas fənləri üzrə biliklərin qiymətləndirilməsi imtahanına buraxılıb.