Ceyhun Bayramov Ukrayna XİN-də Azərbaycan Xalq Cümhuriyyətinin diplomatik irsinə aid arxiv sənədləri ilə tanış olub

Azərbaycanın xarici işlər naziri Ceyhun Bayramov Ukrayna Xarici İşlər Nazirliyində (XİN) arxiv sənədləri ilə tanış olub. Bu barədə Azərbaycan Xarici İşlər Nazirliyinin “X” sosial media hesabında məlumat yayılıb.

Təqdim olunan materiallar Azərbaycan Xalq Cümhuriyyətinin (AXC) Ukraynadakı diplomatik nümayəndəliyinin (komissarlığının) fəaliyyətini, habelə 1918–1920-ci illərdə Azərbaycan ilə Ukrayna arasında mövcud olmuş diplomatik münasibətləri əks etdirir. Sənədlər arasında həmin dövrə aid tarixi yazışmalar, rəsmi məktublar və hesabatlar yer alıb.

Nazirə nümayiş etdirilən materiallar həmçinin Azərbaycan və Qafqaz regionu ilə bağlı hazırlanmış hesabatlardan ibarətdir. Bu sənədlər iki ölkə arasında tarixi əlaqələrin öyrənilməsi baxımından əhəmiyyət kəsb edir.

Qeyd edək ki, Ceyhun Bayramovun Ukraynaya səfəri çərçivəsində həm ikitərəfli görüşlər keçirilib, həm də arxiv materialları ilə tanışlıq baş tutub. Bu addım Azərbaycan və Ukrayna arasında diplomatik əlaqələrin tarixi köklərinin araşdırılmasına töhfə verir.