Bakıda 6 marşrutun hərəkəti alternativ küçələrlə təşkil ediləcək

Bakının Şıxəli Qurbanov küçəsinin Füzuli küçəsi ilə kəsişməsindən Salatın Əsgərova küçəsi ilə kəsişməsinədək olan hissəsində aidiyyəti qurum tərəfindən təmir işləri aparılır. Bu səbəbdən həmin ərazidə nəqliyyat vasitələrinin hərəkətinə müvəqqəti məhdudiyyət tətbiq edilib. Məlumatı Azərbaycan Yerüstü Nəqliyyat Agentliyi (AYNA) yayıb.

Məhdudiyyət avqustun 7-dən 10-dək qüvvədə olacaq. Bu müddət ərzində 33, 52, 65 və 79 nömrəli müntəzəm marşrutların hərəkəti dəyişdirilib. Həmin avtobuslar Füzuli və Abdulla Şaiq küçələri, İnşaatçılar prospekti və Abbasqulu ağa Bakıxanov küçəsi ilə, daha sonra isə mövcud sxem üzrə hərəkət edəcək.

Əks istiqamətdə isə bu marşrutlar Abbasqulu ağa Bakıxanov küçəsi, İnşaatçılar və Nəriman Nərimanov prospektləri, həmçinin Mirzəağa Əliyev küçəsi ilə, daha sonra mövcud sxem üzrə davam edəcək.

Bundan başqa, 14 və 96 nömrəli marşrutların hərəkəti də müvəqqəti dəyişdirilib. Onlar Füzuli və Abdulla Şaiq küçələri ilə, əks istiqamətdə isə Nəriman Nərimanov prospekti və Mirzəağa Əliyev küçəsi ilə, daha sonra mövcud sxem üzrə təşkil olunacaq. Sərnişinlərə bu müddət ərzində marşrutlardan istifadə edərkən dəyişiklikləri nəzərə almaları tövsiyə olunur.