Özəl universitetlərdə qəbul planının 91,34 faizi dolub

2025-ci il tələbə qəbulu nəticələrinə əsasən, özəl ali təhsil müəssisələrində qəbul planının 91,34 faizi dolub. Bu barədə məlumat “Abituriyent” jurnalının 12-ci nömrəsində dərc olunan elmi-statistik materiallarda əksini tapıb. Jurnal 2025/2026-cı tədris ili üçün tələbə qəbulu və ümumi təhsil müəssisələri üzrə buraxılış imtahanlarının nəticələrini əhatə edir.

Özəl ali təhsil müəssisələri üzrə ümumilikdə 10 317 plan yeri ayrılıb. Bu yerlərin 9 424-nə qəbul aparılıb. Qəbul olunan tələbələrdən 8 588 nəfəri Azərbaycan bölməsində, 836 nəfəri isə rus bölməsində təhsil alacaq. Onlardan 2 208 nəfəri dövlət sifarişi əsasında qəbul olunub.

İxtisas qrupları üzrə göstəricilər fərqlənir. I qrupda 1 749 plan yerinə 1 546 nəfər qəbul olunub və qəbulolma faizi 88,39 təşkil edib. II qrupda 4 090 plan yerindən 3 588-i dolub, qəbulolma faizi 87,73 olub. III qrupda 3 693 plan yerindən 3 589-u tutulub və bu qrup ən yüksək göstərici ilə – 97,18 faizlə seçilib. IV qrupda 575 plan yerinə 513 nəfər qəbul olunub ki, bu da 89,22 faizə bərabərdir. V qrupda isə 210 plan yerindən 188-i dolub və qəbulolma faizi 89,52 təşkil edib.

Subbakalavrlar üzrə ümumilikdə 1 540 nəfər qəbul olunub. Bu kateqoriya üzrə qəbul planının dolma faizi 14,93 təşkil edib. Abituriyentlər üzrə isə 10 317 plan yerindən 7 884-nə qəbul aparılıb və qəbul planının 76,42 faizi dolub. Onlardan 7 152 nəfər Azərbaycan, 732 nəfər isə rus bölməsində təhsil alacaq. Dövlət sifarişi əsasında qəbul olunan abituriyentlərin sayı isə 2 153 nəfər olub.