Bakıda ofis binasında yanğın: bir nəfər xilas edilib

Bakının Nərimanov rayonunda, Nadir Əliyev küçəsi 5 ünvanında yerləşən dördmərtəbəli mansard tipli binada yanğın hadisəsi qeydə alınıb. Fövqəladə Hallar Nazirliyinin (FHN) məlumatına görə, hadisə yerinə dərhal Dövlət Yanğından Mühafizə Xidmətinin qüvvələri cəlb edilib.

Yanğınsöndürənlər hadisə yerində əməliyyat şəraitini qiymətləndirərkən müəyyən ediblər ki, yanğın binanın ikinci mərtəbəsində yerləşən ofisdə başlayıb. Operativ müdaxilə sayəsində alovun genişlənməsinin qarşısı alınıb və yanğın qısa müddətdə söndürülüb.

Hadisə zamanı binada köməksiz vəziyyətdə qalmış bir nəfər vətəndaş yanğınsöndürənlər tərəfindən xilas edilib. Xəsarət alanlar barədə məlumat verilmir.

Yanğın nəticəsində ümumi sahəsi 90 kvadratmetr olan beşotaqlı ofisin bir otağı 30 kvadratmetr sahədə və otaqdakı əşyalar yanıb. Ofisin digər otaqları və binadakı digər obyektlər yanğından qorunub saxlanılıb.