Kirayə mənzillərin seçimi rekord müddətdə başa çatıb: 184 mənzil 16 dəqiqəyə seçilib

Bu gün satmaq öhdəliyi ilə kirayə mexanizmi çərçivəsində mənzillərin seçimi prosesi yekunlaşıb. İpoteka və Kredit Zəmanət Fondu (İKZF) və "AzInTelecom" birgə məlumat yayıb ki, Bakı şəhəri Binəqədi rayonu Cəfər Xəndan küçəsində yerləşən yaşayış kompleksində 184 yeni, tam təmirli mənzil vətəndaşların seçiminə təqdim olunub.

Seçim prosesində Azərbaycanda ilk dəfə olaraq İKZF-nin təşəbbüsü ilə yaşayış sahələrinin kütləvi seçimi zamanı SİMA rəqəmsal imzanın üztanıma texnologiyası tətbiq edilib. Bu yenilik prosesin sürətli və təhlükəsiz keçməsinə şərait yaradıb.

Yaşayış sahələri vətəndaşlar tərəfindən "Elektron ipoteka və kredit zəmanət" sistemində 16 dəqiqə 22 saniyə ərzində seçilib. Bütün müraciətlər qaydalar çərçivəsində tamamlanıb və proses uğurla yekunlaşıb.

Bu nəticə göstərir ki, rəqəmsal həllər və innovativ texnologiyalar mənzil seçimi prosesini əhəmiyyətli dərəcədə sürətləndirə bilər. İKZF və "AzInTelecom"un birgə tətbiq etdiyi bu mexanizm gələcəkdə daha geniş miqyasda istifadə oluna bilər.