Avstriyada yeni istilik rekordu: 41 dərəcə qeydə alınıb

Avqustun 4-də Avstriyada havanın temperaturu 41°C-yə çataraq ölkə tarixində yeni mütləq rekord müəyyən edib. Bu göstərici əvvəlki 40,5°C-lik maksimumu üstələyib. Məlumat yerli "Kronen Zeitung" nəşrinə istinadən yayılıb.

Ekstremal isti hava şəraiti ilə əlaqədar ölkənin şərq bölgələrində ən yüksək təhlükə səviyyəsi elan edilib. Eyni zamanda, Burgenland federal əyalətində meşə yanğını davam edir ki, bu da vəziyyəti daha da gərginləşdirir.

Avropada müşahidə olunan anomal istilər kənd təsərrüfatına ciddi zərər vurub. Son dörd həftə ərzində Avropa İttifaqı və Böyük Britaniyada dənli bitkilərin istehsal proqnozu təxminən 9 milyon ton azaldılıb. Ekspertlər bu itkinin dəyərini təxminən 2,1 milyard avro qiymətləndirirlər ki, bu da gözlənilən ümumi məhsul dəyərinin təxminən 5%-ni təşkil edir.

Xüsusilə, qarğıdalı istehsalı proqnozu Aİ və Böyük Britaniya üzrə 57,2 milyon tondan 52,7 milyon tona endirilib. Bu azalma buğda, arpa və digər dənli bitkilərin qiymətləri nəzərə alınmaqla hesablanıb. Bundan əvvəl də anomal istilərin Fransada kənd təsərrüfatı məhsuldarlığına mənfi təsir göstərdiyi bildirilmişdi.