Bakı-Tbilisi-Bakı qatarına əlavə reys: Gürcüstan tərəfi texniki səbəblərdən qəbul edə bilmir

Nəqliyyat məsələləri üzrə ekspert Eldəniz Cəfərov bildirib ki, Azərbaycan Dəmir Yolları Bakı-Tbilisi-Bakı marşrutu üzrə əlavə reys təşkil edib və bu məqsədlə qatar hazırdır. Lakin Gürcüstan tərəfi bu qatarı qəbul etməyə hazır deyil. Ekspertin sözlərinə görə, Gürcüstan tərəfində bir sıra texniki çətinliklər mövcuddur.

Cəfərov qeyd edib ki, əsas problemlərdən biri qatarların stansiyada olduğu müddətdə elektrik təchizatının təmin edilməsi ilə bağlıdır. Qatarların manevr və digər hərəkətləri zamanı elektrik təchizatında yaranan problemlər Bakı-Tbilisi-Bakı qatarının gecikməsinə səbəb olur. Bundan əlavə, Gürcüstan sərhəd xidməti də əlavə reys üzrə sərhəd yoxlamalarını həyata keçirməyə hələ hazır deyil.

Ekspert vurğulayıb ki, son vaxtlar Gürcüstan tərəfində bir sıra texniki və təşkilati problemlər müşahidə olunur. Xüsusilə, qatarların Gürcüstan tərəfində sərhəd yoxlamalarının nəzərdə tutulan bir saatdan artıq davam etməsi də gecikmələrə səbəb olur. Azərbaycan tərəfi artıq əlavə qatar təşkil edib, lakin Gürcüstan tərəfi bu reysi qəbul etməyə hazır deyil.

Qeyd edək ki, Azərbaycan Dəmir Yolları Bakı-Tbilisi-Bakı beynəlxalq marşrutu üzrə bilet satış müddətini də artırıb. Şirkət bu dəyişikliyi sərnişin məmnuniyyətinin artırılması, artan tələbatın daha səmərəli qarşılanması və səfərlərin əvvəlcədən planlaşdırılması imkanlarının genişləndirilməsi məqsədilə həyata keçirib. Yeni mexanizm çərçivəsində satış müddəti mərhələli şəkildə artırılır və hazırda sərnişinlər üçün əvvəlki 30 gün əvəzinə 44 günlük bilet satışı açıqdır. Satış pəncərəsi növbəti günlərdə mərhələli şəkildə genişləndirilərək 90 günə çatdırılacaq.