Bakı metrosunun "Cəfər Cabbarlı" stansiyasında platformanın rekonstruksiyası yekunlaşır

Bakı metropoliteninin "Cəfər Cabbarlı" stansiyasında platformalardan birinin rekonstruksiyası yekunlaşma mərhələsindədir. Bu barədə "Bakı Metropoliteni" QSC-nin mətbuat xidmətinin rəhbəri Bəxtiyar Məmmədov məlumat verib.

Rekonstruksiya işləri paytaxt metrosunun iki xəttinin ayrılması layihəsi çərçivəsində "Cəfər Cabbarlı"-"Xətai" hissəsində aparılan texniki işlərin bir hissəsidir. Hazırda platformada əlavə piyada pilləkəninin tikintisi davam edir və bu işlər yaxın zamanda başa çatdırılacaq.

Pilləkənin istifadəyə verilməsindən sonra platforma sərnişinlər üçün açılacaq. Lakin layihə çərçivəsində "Cəfər Cabbarlı" stansiyasından "Nizami" stansiyasına qədər yeni tunellərin çəkilməsi nəzərdə tutulduğundan, infrastrukturun sinxronlaşdırılması üzrə əlavə işlər görüləcək.

Qeyd edək ki, xətlərin ayrılması layihəsi Bakı metrosunun sərnişin daşıma qabiliyyətinin artırılması və hərəkətin daha səmərəli təşkili məqsədi daşıyır. Bu istiqamətdə texniki işlər mərhələli şəkildə həyata keçirilir.