Aygün Kazımova: "Güclü qadın olmaq Aygün Kazımova deməkdir"

Xalq artisti Aygün Kazımova Axşam.az-a müsahibəsində səhnə həyatı, geyimlərə münasibəti, gündəlik rejimi və qadınlıq haqqında düşüncələrini bölüşüb. Sənətçi bildirib ki, onun üçün hər bir geyim xatirədir və o, heç bir paltarını nə hədiyyə edir, nə də satır. Kazımova vurğulayıb ki, sadə geyimlər geyinmir və bütün paltarlarını saxlayır.

Müğənni səhnəyə çıxmağın ciddi hazırlıq tələb etdiyini qeyd edib. Onun sözlərinə görə, hər çıxış üçün yeni obraz və geyim hazırlanır və bu, onun üçün sənət əsəridir. Kazımova illərdir birlikdə çalışdığı komandasını - Rüfət İsmayıl, Ruxa, Günəş Nur və digərlərini xüsusi vurğulayıb. Hətta bir mahnı oxuyacağı çıxış üçün belə ciddi hazırlıq görüldüyünü bildirib.

Alış-verişə olan sevgisindən danışan sənətçi deyib ki, mağazaya getmir, mağaza ona gəlir. Ruxanın geyim xərcləri ilə bağlı iradlarına baxmayaraq, sonradan bu alış-verişləri bəyəndiyini söyləyib. Kazımova bu hobbisini həm qadınlığından, həm də sənətinə olan sevgisindən irəli gəldiyini izah edib.

Gündəlik həyatından danışan Xalq artisti səhərlər çox erkən oyandığını, günə isti su və zeytun yağı ilə başladığını, sonra qəhvə içib idman etdiyini deyib. Yay aylarında dəniz kənarında gəzintilər etdiyini və günün ən maraqlı hissəsinin geyim seçimi olduğunu bildirib. O, sevdiyi qızları - Yanita, Şarlin və Merlinin həmişə yanında olduğunu qeyd edib.

"Güclü qadın olmaq nə deməkdir" sualına Kazımova "Güclü qadın olmaq Aygün Kazımova deməkdir" cavabını verib. O, qadını cazibədar edən amillərin təmkin və hövsələ olduğunu, gözəl qadına əvvəlcə görünüşünə görə yanaşıldığını, lakin onu tanıdıqdan sonra fikirlərin dəyişdiyini söyləyib. Plastik əməliyyatlarla bağlı suala isə sənətçi əsas məsələnin insanın enerjisi olduğunu və hər şeyin kompleks şəkildə edilməli olduğunu vurğulayıb.