Azərbaycan Mərakeşdə keçirilən beynəlxalq tədbirdə fəxri ölkə seçilib

Azərbaycan Mərakeşin Laraş şəhərində keçirilən Dünya Mərakeşlilərinin 2-ci Beynəlxalq Görüşündə fəxri ölkə seçilib. Bu barədə Azərbaycanın Mərakeş Krallığında fövqəladə və səlahiyyətli səfiri Nazim Səmədov "X" sosial şəbəkə hesabında məlumat yayıb.

Tədbir avqustun 2-dən 4-dək davam edib və Azərbaycan bu nüfuzlu görüşdə xüsusi qonaq qismində iştirak edib. Səfirliyin müvəqqəti işlər vəkili Tural Rəsulov çıxışında Azərbaycan ilə Mərakeş arasındakı dostluq və əməkdaşlıq münasibətlərinin yüksək səviyyəsini vurğulayıb.

Rəsulov həmçinin xalqların yaxınlaşmasında və beynəlxalq mübadilələrin inkişafında diasporların mühüm rolunu qeyd edib. O, iki ölkə arasındakı əlaqələrin möhkəmlənməsində bu cür tədbirlərin əhəmiyyətini diqqətə çatdırıb.

Görüşün fəxri ölkəsi kimi Azərbaycanın seçilməsi ölkələr arasındakı münasibətlərin daha da genişləndirilməsi baxımından əlamətdar hadisə kimi qiymətləndirilir. Tədbir çərçivəsində mədəni mübadilə və əməkdaşlıq imkanları da müzakirə olunub.