Sosial məzuniyyət kimlərə şamil edilir?

Əmək və Əhalinin Sosial Müdafiəsi Nazirliyi (ƏƏSMN) sosial məzuniyyətlərin verilməsi qaydaları barədə məlumat yayıb. Məlumata görə, işləyən qadınlara hamiləlik və doğuşla əlaqədar ümumilikdə 126 təqvim günü ödənişli məzuniyyət verilir. Bu müddət doğuşdan əvvəl 70, doğuşdan sonra isə 56 təqvim gününü əhatə edir.

Nazirlik qeyd edib ki, doğuşdan əvvəlki məzuniyyət hissəsi, doğuş gözlənilən gündən uşağın faktiki doğulduğu günə qədər keçən müddət qədər ödənişli olaraq uzadılır. Bu halda doğuşdan sonrakı məzuniyyət müddəti azaldılmır. İki aylığadək uşağı övladlığa götürən qadınlar da doğuşdan sonrakı 56 günlük ödənişli sosial məzuniyyət hüququndan istifadə edə bilərlər.

Kişilərə isə uşağın doğulması ilə əlaqədar tibb müəssisəsinin arayışı əsasında ümumilikdə 14 təqvim günü ödənişli məzuniyyət verilir. Bu məzuniyyət doğuşdan əvvəl və doğuşdan sonrakı dövrü əhatə edə bilər.

Bundan əlavə, uşağa bilavasitə qulluq edən valideynlərdən biri (o cümlədən övladlığa götürən qadınlar) və ya ailənin digər üzvü, uşaq üç yaşına çatana qədər qulluq məzuniyyəti almaq hüququna malikdir. Bu məzuniyyət qanunvericiliklə müəyyən edilmiş məbləğdə müavinət ödənilməklə qismən ödənişli sosial məzuniyyət kimi təqdim edilir.