Bakıda binanın altında metroya keçid tikintisi ilə bağlı mübahisə

Bakının Məhəmməd Hadi küçəsində yerləşən 17 mərtəbəli binanın sakinləri binanın altındakı ticarət mərkəzinə metrodan keçid tikildiyini iddia edirlər. Sakinlərin sözlərinə görə, aparılan işlər onların evlərində rahat yaşamasına mane olur. Sakinlərdən biri bildirib ki, binanın altını qazırlar, dəmirləri kəsirlər və bu, binanın uçması riski yaradır.

Özünü binanın komendantı kimi təqdim edən İsa Talıblı isə bildirib ki, sakinlərin tikinti gedən ərazi kimi qeyd etdikləri yer binaya deyil, metroya aiddir və bunun binaya heç bir aidiyyəti yoxdur. O, sakinlərin narahatlığını əsassız hesab edir.

Məsələ ilə bağlı "Bakı Metropoliteni"ndən bildirilib ki, "Həzi Aslanov" stansiyasının 5-ci çıxışı istiqamətində yerləşən ticarət mərkəzi tərəfindən həmin əraziyə birbaşa keçidin təşkili ilə bağlı müraciət olunub. Müraciətə baxılaraq, metropolitenin müəyyən etdiyi texniki şərtlər, tikinti norma və qaydaları, eləcə də bütün təhlükəsizlik tələblərinin tam təmin edilməsi şərti ilə keçidin inşasına razılıq verilib.

Metropolitendən qeyd edilib ki, yeni keçid sərnişinlərin hərəkətinin daha rahat və təhlükəsiz təşkilinə, eləcə də sərnişin axınının daha səmərəli yönləndirilməsinə xidmət edəcək. Beləliklə, qurum tikintinin təhlükəsizlik tələblərinə uyğun aparıldığını və binaya heç bir təhlükə yaratmadığını bildirir.