Rezidentura imtahanının II mərhələsində 996 namizəd iştirak edəcək

Dövlət İmtahan Mərkəzi (DİM) 9 avqust 2026-cı il tarixində rezidenturaya qəbul imtahanının ikinci mərhələsini keçirəcək. İmtahan Bakıda DİM-in elektron imtahanlar korpusunda (Binəqədi rayonu, S.S.Axundov küçəsi, 50, TÜRKPA-nın yanı) və Naxçıvan şəhərindəki 4 saylı orta məktəbdə elektron formada təşkil olunacaq.

İmtahan iki növbədə keçiriləcək: birinci növbə saat 10:00-da, ikinci növbə isə saat 15:00-da başlayacaq. İmtahanın müddəti 2 saat 30 dəqiqədir. Buraxılış rejimi imtahanın başlanmasına 15 dəqiqə qalmış, saat 09:45-də və 14:45-də başa çatacaq. Bu vaxtdan sonra gələn iştirakçılar imtahan binasına buraxılmayacaq.

İmtahanın ikinci mərhələsində iştirak etmək üçün 996 namizəd qeydiyyatdan keçib. Onlardan 360 nəfəri oğlan, 636 nəfəri isə qızdır. Namizədlərin 831-i Azərbaycan bölməsinin, 165-i rus bölməsinin iştirakçısıdır. 426 nəfər cari ilin məzunu, 570 nəfər isə əvvəlki illərin məzunudur. Qeydiyyatdan keçənlər arasında 3 nəfər xarici ölkə vətəndaşıdır.

Bakı şəhərində 957, Naxçıvan şəhərində isə 39 namizədin imtahan verəcəyi gözlənilir. Bu mərhələdə iştirak edəcək 996 nəfərdən 314-ü ötən illərdəki imtahan nəticəsinə görə, 682-si isə builki imtahanlarda məqbul qiymət aldığı üçün ixtisas fənləri üzrə biliklərin qiymətləndirilməsi imtahanına buraxılıb.