Norveçin cənubunda su ehtiyatları 30 illik minimuma düşüb

Norveçin cənubunda təbii su anbarlarındakı suyun həcmi hava şəraiti ilə əlaqədar son 30 ilin ən aşağı səviyyəsinə enib. Məlumata görə, regiondakı su anbarlarının doluluq səviyyəsi 53 faizdən bir qədər çoxdur ki, bu da üç onillikdə ən aşağı göstəricidir. Əsas səbəb kimi quraq yay mövsümü göstərilir.

Su anbarlarının vəziyyəti ölkənin elektrik enerjisi istehsalında mühüm rol oynayır, çünki Norveçin enerji istehsal gücünün böyük hissəsi hidroelektrik stansiyalara əsaslanır. Suyun azalması bu stansiyaların işinə birbaşa təsir göstərə bilər.

Norveçin energetika naziri Terje Aasland mövcud vəziyyətlə bağlı narahatlığa əsas olmadığını bildirib. O, qış aylarında ölkənin elektrik enerjisi çatışmazlığı ilə üzləşə biləcəyi ilə bağlı ehtimalları rədd edib.

Qeyd edək ki, oxşar problemlər digər Avropa ölkələrində də müşahidə olunur. Dunay çayının kritik səviyyədə dayazlaşması səbəbindən Rumıniya və Macarıstan öz atom elektrik stansiyalarının tam dayanması və bu istehsal həcminin itirilməsi riski ilə üzləşib.