Kardioloq Elnur İmanov ona aid edilən səs yazısını yalanladı

Sumqayıt Tibb Mərkəzində çalışan uşaq kardioloqu Elnur İmanov sosial şəbəkə hesabında ona aid olduğu iddia edilən səs yazısı ilə bağlı açıqlama yayıb. Həkim bildirib ki, yayılan səs yazısı ona aid deyil və bu materialın ictimaiyyətə çıxarılmasını qəbuledilməz hesab edir.

İmanov qeyd edib ki, müasir texnologiyalar istənilən insanın səsini təqlid etməyə, səs yazısını montaj etməyə və saxta material hazırlamağa imkan verir. O, 30 ildən artıqdır ki, uşaq kardioloqu kimi çalışdığını, minlərlə uşağın müalicəsində iştirak etdiyini və bu müddət ərzində qazandığı etimadı xatırladıb. Həkim vurğulayıb ki, yayılan səs onun səsinə tam uyğun gəlmir.

Kardioloq media qurumlarına bir sıra suallar ünvanlayıb: səs yazısını kimin təqdim etdiyini, şikayətçi adlandırılan şəxsin mövcudluğunun necə təsdiqləndiyini, iddiaların hansı sənədlərlə yoxlanıldığını və səs yazısının montaj olunmadığının hansı ekspertiza ilə müəyyən edildiyini soruşub. O, həmçinin məsələyə adı qarışdırılan Təranə xanımın hazırda məzuniyyətdə olduğunu və onun mövqeyinin öyrənilib-öyrənilmədiyini sual edib.

Həkim bildirib ki, anonim mənbənin jurnalistikada mümkün olduğunu, lakin onun əsassız iddiaların arxasında gizlənmək üçün vasitəyə çevrilməməli olduğunu vurğulayıb. O, media qurumlarının mənbənin real şəxs olduğunu və məlumatın həqiqiliyini özləri dəqiqləşdirməli olduğunu qeyd edib.

Elnur İmanov səs yazısının ekspertizaya təqdim edilməsi, materialı ilk hazırlayan və yayan şəxslərin müəyyən edilməsi və məlumatı yoxlamadan tirajlayan media qurumlarının məsuliyyətinə hüquqi qiymət verilməsi üçün bütün zəruri addımları atacağını bildirib. O, susmağının zəiflik kimi qəbul edilməməsini vurğulayıb və həqiqətin ekspertiza, sübut və hüquqla müəyyən olunduğunu qeyd edib.