Bakıda 24 nömrəli marşrutun hərəkət sxemi müvəqqəti dəyişdirilib

Bakının Təbriz küçəsində, metronun "Nəriman Nərimanov" stansiyasının ətrafında aparılan təmir işləri ilə əlaqədar 24 nömrəli müntəzəm avtobus marşrutunun hərəkət sxemi müvəqqəti dəyişdirilib. Bu barədə Azərbaycan Yerüstü Nəqliyyat Agentliyi (AYNA) məlumat yayıb.

Təmir işləri yekunlaşanadək 24 nömrəli marşrutun son dayanacaq məntəqəsi Ağa Nemətulla küçəsində müəyyən edilib. Avtobusların Bakıxanov qəsəbəsi istiqamətində hərəkəti isə Ağa Nemətulla, Fətəli xan Xoyski və Əhməd Rəcəbli küçələri ilə, daha sonra mövcud sxem üzrə təşkil olunub.

Dəyişiklik yalnız təmir işləri davam edən müddət ərzində qüvvədə olacaq. Sərnişinlərə marşrut üzrə hərəkət edərkən yeni sxemi nəzərə almaları tövsiyə olunur.

Qeyd edək ki, bu barədə məlumatı Rəqəmsal İnkişaf və Nəqliyyat Nazirliyi yanında fəaliyyət göstərən AYNA yayıb.