Bakı metrosunda Qırmızı və Yaşıl xətlərin ayrılması layihəsinə avqustun 15-də başlanılacaq

Bakı metropolitenində Qırmızı və Yaşıl xətlərin ayrılması layihəsinin tikinti mərhələsinə avqustun 15-dən start verilməsi planlaşdırılır. Bu layihə çərçivəsində "Nizami"–"28 May" stansiyaları arasındakı mövcud tunel istismardan çıxarılacaq və konstruktiv baxımdan ləğv ediləcək. Onun əvəzinə "Nizami"–"Cəfər Cabbarlı" istiqamətində iki yeni metro tunelinin inşası nəzərdə tutulub.

Tikinti işlərinin təxminən 10 ay davam edəcəyi gözlənilir. Bu müddət ərzində Yaşıl xətt üzrə qatarların hərəkəti müvəqqəti olaraq yalnız "Nizami" stansiyasına qədər təşkil olunacaq. Qırmızı və Yaşıl xətlər arasında birbaşa metro əlaqəsi müvəqqəti dayandırılacaq və bu, sərnişinlərin xəttlərarası keçid imkanlarını məhdudlaşdıracaq.

Yaranacaq nəqliyyat çətinliklərini minimuma endirmək üçün M1–M6 indeksli 6 müvəqqəti ekspres avtobus marşrutu təşkil ediləcək. Bu marşrutlara ümumilikdə 87 avtobus cəlb olunacaq. Bundan əlavə, mövcud müntəzəm avtobus marşrutlarına 97 əlavə avtobus buraxılacaq. Sərnişinlərin səfərlərinin mövcud metro xətləri və ya alternativ yerüstü ictimai nəqliyyat vasitələri ilə təşkil edilməsi nəzərdə tutulur.

Layihənin icrası başa çatdıqdan sonra Qırmızı və Yaşıl xətlər tam müstəqil fəaliyyət göstərəcək. Bu, bir xəttdə baş verən nasazlıq və ya gecikmənin digər xəttə təsir etməməsini təmin edəcək. "28 May" stansiyasında platforma yüklənməsi və sərnişin sıxlığı əhəmiyyətli dərəcədə azalacaq. Yaşıl xətt üzrə "Cəfər Cabbarlı–Xətai" sahəsində qatarların hərəkət intervalı 8 dəqiqədən 3 dəqiqə 30 saniyəyədək azalacaq. Gələcək mərhələlərdə hər iki xətt üzrə intervalın təxminən 2 dəqiqəyədək endirilməsi üçün texniki imkan yaradılacaq.

Tikinti dövründə sərnişinlərə müvəqqəti hərəkət sxemi və alternativ marşrutlar barədə intensiv məlumat veriləcək. Layihə müvəqqəti çətinliklər yaratsa da, Bakı Metropoliteninin gələcək inkişafı üçün əsas infrastruktur məhdudiyyətini aradan qaldıracaq və şəhərin artan nəqliyyat tələbatına uyğun dayanıqlı metro şəbəkəsinin formalaşdırılmasına imkan verəcək.