Kaliforniyada ABŞ hərbi F-35 qırıcısı qəzaya uğrayıb

ABŞ-ın Kaliforniya ştatında beşinci nəsil F-35 qırıcı təyyarəsi qəzaya uğrayıb. Hadisə "Miramar" hərbi hava bazasının ətrafında baş verib və bu barədə "Fox News" telekanalı bazanın rəsmi nümayəndəsinə istinadən məlumat yayıb.

Qəza ABŞ Dəniz Piyadaları Korpusuna məxsus F-35B modeli təyyarənin iştirakı ilə baş verib. Hadisə "A sinifli" qəza kimi təsnif edilib, yəni ümumi zərərin 2,5 milyon dolları ötdüyü və ya təyyarənin tamamilə sıradan çıxdığı bildirilir. Təyyarə yerə düşdükdən sonra alışıb.

Pilot təyyarədən katapult edərək xilas olmağı bacarıb. Lakin onun sağlamlıq vəziyyəti və hadisənin dəqiq səbəbləri barədə hələlik rəsmi məlumat açıqlanmayıb.

Qeyd edək ki, F-35 qırıcılarının orta qiyməti 80 milyon dolları keçə bilər. Hadisənin təfərrüatları araşdırılır.