İbrahim Həsənov U-17 dünya çempionatının finalında

Azərbaycanın sərbəst güləşçisi İbrahim Həsənov Bakıda keçirilən U-17 dünya çempionatının finalına yüksəlib. 51 kq çəki dərəcəsində çıxış edən idmançı yarımfinalda rusiyalı İslam Kuraxmayevi 10:6 hesabı ilə məğlub edərək qızıl medal uğrunda mübarizə hüququ qazanıb.

Final görüşündə Həsənovun rəqibi iranlı Benyamin Aşoften Mayvan olacaq. Bu qarşılaşma avqustun 2-də baş tutacaq. Azərbaycanlı güləşçi turnirə qədərki mərhələlərdə də uğurlu nəticələr göstərib: 1/4 finalda hindistanlı Qovind Qovindi 10:3, 1/8 finalda isə gürcüstanlı Giorgi Narimanidzeni 4:2 hesabı ilə üstələyib.

Dünya çempionatı Milli Gimnastika Arenasında təşkil olunur. Yarışa 60-dan çox ölkədən 700-ə yaxın yeniyetmə güləşçi qatılıb. Azərbaycanı bu mundialda 29 pəhləvan təmsil edir.