Bloqer Hüseyn Həsənovun 6 il həbsi tələb olunur

Rusiya prokurorluğu bloqer Hüseyn Həsənovun pul vəsaitlərinin leqallaşdırılması ilə bağlı qiyabi iş üzrə 6 il müddətinə azadlıqdan məhrum edilməsini istəyir. Bu barədə bloqerin vəkili Mixail Yusupov məlumat verib. İş qiyabi qaydada aparılır, çünki Həsənov ölkəni tərk edib və axtarışdadır.

İttiham tərəfinin versiyasına görə, Həsənov 170 milyon rubldan (təxminən 2,1 milyon dollar) çox məbləğdə vergidən yayınıb. Daha sonra o, daşınmaz əmlakın alqı-satqısı müqaviləsi bağlayaraq bu vəsaitlərin bir hissəsini leqallaşdırmaqda ittiham olunur. Bloqer isə öz növbəsində bu ittihamları qəbul etmir və özünü təqsirli bilmir.

Həsənov əvvəllər sosial şəbəkələrdə vergi borcunu ödədiyini və məhkəmədə maraqlarını vəkillər komandasının təmsil etdiyini bildirmişdi. Onun vəkili işin təfərrüatları barədə ətraflı məlumat verməyib, lakin məlumdur ki, məhkəmə prosesi qiyabi formada davam edir.

2025-ci ilin yazında Həsənov qiyabi həbs olunaraq axtarışa verilib. İstintaqın məlumatına görə, o, həmin ilin fevralında Rusiya ərazisini tərk edib. KİV-in məlumatına görə, bloqerin hazırda Azərbaycanda və ya Birləşmiş Ərəb Əmirliklərində olması ehtimal edilir.