Bilgəhdə 25 yaşlı gənc dənizdə batıb

Bakının Sabunçu rayonunun Bilgəh qəsəbəsində dənizdə gənc oğlan batıb. Hadisə "Daçnik" adlanan ərazidə, ən yaxın xilasetmə məntəqəsindən təxminən 2 kilometr aralıda, nəzarətsiz zonada baş verib.

Fövqəladə Hallar Nazirliyinin (FHN) Mətbuat xidmətindən verilən məlumata görə, 2001-ci il təvəllüdlü Nizami Kərimovun batdığı ehtimal edilir. Hadisə yerinə FHN-in Kiçikhəcmli Gəmilərə Nəzarət və Sularda Xilasetmə Dövlət Xidmətinin dalğıc-xilasediciləri cəlb edilib.

Xilasedicilər hazırda gəncin batdığı istiqamətlərdə axtarış işlərini davam etdirirlər. Hadisənin dəqiq səbəbləri hələlik məlum deyil.

Qeyd edək ki, bu, son günlərdə Bilgəh çimərliyində baş verən ikinci belə hadisədir. Əvvəlki günlərdə də oxşar faciə yaşanıb. Xilasetmə məntəqəsindən uzaq məsafədə yerləşən ərazilərdə çimərliklərin nəzarətsiz olması vəziyyəti daha da təhlükəli edir.